المقادير:
-جبنة ريكوتا - الجبنة دي مخصوص بتتعمل بيها الحلويات... هاتلاقوها في محلات الألبان الكبيرة أو في سوبر ماركتس كبيرة-... و لو مش لقيتوها البديل هو: علبة جبنة كيري صغيرة أو متوسطة -حسب الكمية إللي إنتوا عايزينها-
-4 ملاعق كبيرة سكر
-باكيت كريم شانتيه
-علبة قشطة بوك أو أى كمية قشطة عادية بس يفضل تكون أكتر من 4 ملاعق كبيرة
-ملعقة صغيرة لبن نيدو
-نص كوب لبن حليب -أو أكتر شوية صغيرين لو إحتاجتوا-
-باكيت فانيليا
- علبة أو إتنين بسكوت سادة -أي نوع-
-ملعقتان كبيرتان سمنة أو زبدة
الطريقة:
أول حاجة لازم نعمل القاع بتاع التشيز كيك.. بنجيب البسكوت نحطه في المطحنة القصيرة دي بتاعت الخلاط... و بيتحطن لحد ما يبقى عامل زي البودرة و بنجيب صنية يفضل تكون تيفال و تكون المستطيلة دي.. يعني رفيعة و طويلة و دي بتبقى أنسب صنية للتشيز كيك... و بنحط فيها البسكوت المطحون و نحط عليه شوية سمنة مش كتير... معلقة كبيرة أو معلقتين مثلاً... عشان يبقى ماسك نفسه و التشيز كيك ماتفرولش مننا لما نيجي نغرفها.. و بنفضل نبطط البسكوت بالمعلقة و نساويه كدة عشان يبقى مفعوص... و نطول بالنا عليه
تاني حاجة بنعمل التشيز كيك نفسها... بنجيب طبق عميق نحط فيه الجبنة الريكوتا أو الكيري و فوقيهم الكريم شانتية و الفانيليا و اللبن و لبن النيدو و القشطة و السكر و نقلبهم... طبعاً التقليب بياخد وقت كتير لحد ما الجبنة تتهرس و الكريمة تبقى متماسكة.. يعني مش المفروض إنها تبقى سايحة, لأ تبقى قوامها تقيل...
تالت حاجة... بتكون الصنية جاهزة فيها البسكوت المفعوص طبعاً... بنقوم حطين عليه الكريمة و نبقى متأكدين إن مافهوش أي حاجة مكلكعة لا الجبنة و لا القشطة... و يفضل إننا ندوق الكريمة عشان مانحطش كمية سكر كبيرة أوي مش المفروض إنها عشان حلويات تبقى مسكرة أوي أوي... و بنروح جايبين الصنية مدخلينها الفرن, مش بنولع الفرن نفسه, لأ الشواية إللي هي فوق دي و بنسيبها و نفضل واقفين جنبها لإننا بنحطها عشان تاخد اللون البني الفاتح على الوش بس, و اللون دة هى بتاخده بسرعة جداً فخلوا بالكم منها مش هتاخد أكتر من 5 دقايق تقريباً... و بتطلعوها تبرد 10 دقايق و تحطوها في التلاجة شوية تبرد .. بنغرفها بالمغرفة المبططة الكبيرة بتاعت المكرونة البشاميل...
و بالهنا و الشفا
(منقووووول)
موضوع: طريقة التشيز كيكز..سهلة جداااااا 
الإثنين 12 نوفمبر 2007 - 13:43
