:: حبة القمح .. تأمل ::

تعالوا نتأمل فى حبة القمح اللى فى القربانة اللى بتتحول لجسد المسيح . حبة القمح دى لازم تمر بمراحل علشان تبقى جزء من القربانة . يعنى لازم تطحن وتتعجن وتدوب مع باقى الحبات . ومينفعش انها تبقى جزء من القربانة من غير المراحل دى .

تخيل ان انت حبة القمح دى . علشان تبقى جزء من جسد المسيح . لازم تمر بالمراحل دى . يعنى لازم تطحن وتتألم وكمان لازم تنكر ذاتك . لأن بعد ما الحبة بتتعجن وتدوب مع باقى الحبات . متقدرش تقول انا لأنها لو قررت كدة من البداية مش هينفع انها تكون جزء من القربانة او من جسد ربنا يعنى .

كلنا كتير بنمر بتجارب وبنحس واحنا جوة التجربة أننا مطحونين بجد وبنقول لربنا لية يارب كدة . هو انا مش ابنك لية تسبنى اتعزب كدة . يارب أنا تعبت بجد . هو دة جزائى أنى أبنك . وأوقات نزعل من ربنا أوى وناخد على خاطرنا

بقولكوا أية متيجوا نبص للتجربة من وجة نظر تانية . كل واحد مننا يختار تجربة مر بيها من زمان وكانت تجربة صعبة وانتهت . وبعدان يسأل نفسة
هل التجربة دى كانت فى صالحى ولا لاء ؟
ربنا أتدخل فى النهاية ولا لاء ؟
التجربة دى علمتنى أية وهل غيرت حاجة فى شخصيتى ؟
طيب ربنا عمل معايا كدة لية ؟ وأشمعنا أنا ؟

كل تجربة بنمر بيها بتكون تذكية من ربنا لينا . وربنا بيكون عاوز يقولنا حاجة من خلالها . بنتعلم منها حاجات كتير . وبنستفيد منها . وفى النهاية أكيد ربنا بيتدخل . صدقنى انت مسنود . مسنود بنعمة ربنا .

عزيزى مهما ان كانت ألامك هتدوب فى حضن ربنا اللى فاتحلك ذراعية ومستنيك . أبكى فى حضنة محدش هيريحك غيرة . ولو مش قادر تقوم أطلب ربنا من مكانك كدة . أرفع قلبك وقولة يارب أنا محتاجلك . مد أيدك وساعدنى . وصدقنى ربنا بيحبك ومستنيك

هل تنسى الأم رضيعها ؟ حتى هؤلاء ينسين . أما أنا فلا أنساك

منقول